Comharbaí Kneecap á lorg i nGaoth Dobhair, tobar na cruthaitheachta á thaoscadh i nDún Chaoin
(This article is produced by our Gaeltacht team and an English version can be read here. )
BEIDH NA GAEIL ag freastal ar dhá fhéile an deireadh seachtaine – ceann acu i nGaoth Dobhair a thugann chun cuimhne ceannródaí craoltóireachta a spreag leithéidí Kneecap agus eile chun tabhairt faoin gceol comhaimseartha as Gaeilge agus ceann eile in iarthar Dhuibhneach a dhéanfaidh ceiliúradh ar oidhreacht na mBlascaod agus an saibhreas litríochta agus béaloidis a thug pobal na n-oileán san don domhan.
Osclóidh Ambasadóir na Palaistíne, Jilan Wahba Abdalmajid, Dorn san Aer in Amharclann Ghaoth Dobhair anocht (tráthnóna Dé hAoine) chun tús a chur le deireadh seachtaine de choirmeacha ceoil, seimineair, ceardlanna agus imeachtaí eile atá mar sprioc acu ceiliúradh a dhéanamh ar Rónán Mac Aodha Bhuí , craoltóir RTÉ RnaG agus ceannródaí ar go leor bealaí.
Bhí Rónán Mac Aodha Bhuí ina chraoltóir le RTÉ RnaG agus ina cheannródaí i ngluaiseacht na Gaeilge. Cailleadh é i Meán Fómhair 2023. RTÉ RTÉ
Cailleadh Mac Aodha Bhuí cothrom an ama seo dhá bhliain ó shin tar éis do bheith buailte le tamall le hailse. Tugadh é chun cuimhne ag mór agóid an deireadh seachtaine i mBaile Átha Cliath nó b’é an fear a’tí ag an agóid dheireanach ar son cearta teanga sa phríomh chathair i 2014.
Cé go raibh cairde agus comhghleacaithe Mac Aodha Bhuí faoi bhrón tar éis a bháis, bheartaigh siad a shaol a cheiliúradh le féile a thug chun cuimhne a rosc catha, Dorn san Aer, manna a bheadh á chraoladh aige go minic le linn a chláir ar RTÉ RnaG, Rónán Beo.
Ar na bannaí ceoil a bheidh ar an ardán anocht, tá Huartán, Cigire na bPuntaí agus Ramper. Oíche Shatharn beidh Bréag, an banna Feirsteach a thuill clú mar gheall ar an Ghaeilge agus reggae a phósadh le chéile, Grooveline agus go leor eile. Taispeánfar scannán nua léirithe ag Michael Moore, From Ground Zero , faoin sléacht atá á dhéanamh i nGaza ar an Domhnach agus beidh críoch croíúil Conallach ar an gcibeal le Ceoltóirí Thoraigh oíche Dhomhnaigh.
Beidh spéis freisin sa chomórtas a bheidh á reáchtáil i gcaitheamh an dheireadh seachtaine, Cath na mBannaí. B’é spreagadh na gceoltóirí agus grúpaí nua an chloch ba mhó ar phaidrín Mac Aodha Bhuí. Beifear ag súil le tallann óg a fheiceáil sa chomórtas seo a leanfaidh sna sála ar leithéidí Kneecap.
Is in Ionad an Bhlascaoid i nDún Chaoin a thionólfar Ceiliúradh na bliana seo. Heritage Ireland Heritage Ireland
In Ionad an Bhlascaoid i nDún Chaoin tráthnóna a osclóidh Éamon Ó Cúív, Uachtarán an Oireachtais agus iar Aire Gaeltachta, Ceiliúradh an Bhlascaoid . Déanfar ceiliúradh ar ‘Chruthaitheacht na Muintire ó Inné go dtí Inniu’ agus beidh ócáidí chun plé a dhéanamh ar thraidisiún amhráin agus ceoil an oileáin.
Mar aon le sin beidh plé phainéal maidin Dé Sathairn chun saol agus saothar an fhile agus fhoilsitheora, Pádraig Ó Snodaigh, a chuir faoi chaibidil. Páirteach sa dioscúrsa sin beidh na scríbhneoirí, údair a d’fhoilsigh an Snodach saothair dá gcuid, Cathal Poirtéir, Pádraig Ó Cíobháin agus Pádraig Mac Fhearghusa.
Tá tacaíocht á fháil ag Beartas Gaeltachta The Journal ón Scéim Tuairiscithe ar Dhaonláthas Áitiúil